Извадок од „Македонија“ – илустрирано списание на матицата на иселениците од Македонија
Број 407 – 1987 г.
Успеси на ФК “Вардар” од Зинделфинген
Фудбалскиот клуб “Вардар” од Зинделфинген, Западна Германија, повеќе од десет години е носител на спортскиот и културниот живот во овој град. Освен тоа, тој е и вистински мост на соработка меѓу татковината и нас, привремено вработените во оваа европска земја. Како спортска екипа, ФК “Вардар” има значајна улога во развивањето и зачувувањето на братството и единството на југословенските народи народности, зашто во него членуваат спортисти од цела Југославија. Освен тоа, вратите клубот се отворени и за спортисти од други националности од светот. Соработуваме и со други клубови од околните места, а посебно со Клубот на Југословените од Штутгарт и со новооснованиот клуб “Македонија” од овој град.
Од постоењето на клубот ФК “Вардар” се натпреваруваме во Втората југолига, каде постигнуваме убави резултати. За нас, нејзините фудбалери и членови на управата,е голема сатисфакција што сме насекаде добро примени и што важиме за фер екипа и добри другари.
Учествуваме на повеќе турнири, а сами сме организатори на спортски натпревари како во мал така и во голем футбал. Освен тоа нашите културни приредби во чест на нашите културни приредби во чест на нашите национални празници секогаш се добро подготвени и со симпатија примени и во германската средина. Веќе се традиционални нашиот турнир по повод 25 Мај, пикникот во чест на Илинден, прославата во чест на 11 Октомври, како и големата другарска вечер со приредба во чест на 29 Ноември. Голема поддршка имаме од нашиот главен покровител – Стопанската банка од Скопје и извонреден пријател и соработник во Реџеп Рамадани, нејзиниот претставник во Штутгарт.
Како успешна спортска екипа имаме ретка радост и можност да гостуваме во нашата татковина : бевме гости во СР Македонија и СР Србија. Тој престој ќе ни остане во трајно сеќавање, како по резултатите што ги постигнавме, така и по убавата атмосфера, другарство и пријателство што нѐ следеше за време на целиот наш престој во татковината.
Можеме да се пофалиме дека досега сме биле домаќини на повеќе друштва и групи од татковината, меѓу кои на КУД “Кузман Јосифовски-Питу” од Гевгелија, КУД “Браќа Минковци” од село Куклис, ФК “Турија” од село Турново, Струмичко и МКУД “25 Мај” од Куманово.
Нашата соработка на спортско и културно-просветно поле во иднина ќе биде уште поголема, а нашите резултати на спортско поле уште подобри.
Срдечни поздрави од сите нас, од Зинделфинген
Киро Златков, претседател на ФК “Вардар” (известувач)
