Извадок од „Македонија“ – илустрирано списание на матицата на иселениците од Македонија
Број 458 – 1991 г.
Хамбург, Германија
Формирана православна црковна општина
На 12 мај пред окулу 200 граѓани, верници, од Република Македонија кои се наоѓаат на привремена работа во Хамбург и други градови од Германија се одржа свеченото отворање на Православната црковна општина во овој град во просториите на Евангелистичката црква “Св. Марко”. Притоа, се отслужи света литургија на која чиноначалствуваше Неговото Високопреосвештенство, митрополитот брегалнички г. Стефан во сослужение на протоереј от Ацо Гиревски делегати на Светиот Синод на Македонската православна црква.
На свеченоста беше присутен конзулот на Југославија во Хамбург, Весна Манојловиќ, претставникот на Хрватската католичка црква отецот Јозо, членови на Управниот одбор на Српската православна црква од Хамбург, како и претставници на Евангелистичката црква од Хамбург. Покрај ова беа присутни делегати од Македонската православна црковна општина од Хановер, Копенхаген, Бремен, Берлин, Брауншвајг, Вилемсхафен и други места од Северна Германија. Тоа беше свеченост на која беа удрени темелите за организирано идно црковно живеење на нашите граѓани во овој дел од Европа.
По отслужената света литургија поканетите гости и верници беа на заеднички ручек и веселба што го организираа членовите на новоформираната црковна општина од Хамбург “Св. Георги Кратовски”. Пред ручекот откако се интонира химната “Денес над Македонија се раѓа”, се даде почит со едноминутно молчење на загинатиот војник Сашо Гешовски во немирите во пристаништето Сплит.
По ручекот беа собрани 660 ДЕМ како доброволен прилог за помош на неговите родители во Кавадарци.
Стојко Давитковски, Хановер (известувач)
